Бид ээлжит ярилцлагын зочноор инстаграм дээрх “Street Photography” цувралуудаараа алдартай гэрэл зурагчин Дарханбаатарыг урилаа. Түүний хоббигоо ажил мэргэжил болгосон түүх болон гэрэл зураг, бичлэг хийхдээ түгээмэл ашигладаг түүл, хэрэгслүүдтэй танилцъя. 

Би өнгөрсөн жил гадаад худалдаа, маркетинг мэргэжлээр Хүмүүнлэгийн Ухааны Их Сургуулийг төгссөн. Оюутан байх хугацаандаа хичээлийнхээ хажуугаар гудамжны гэрэл зураг дарж эхэлснээр өдгөө хобби маань ажил мэргэжил болсон байна. Хамгийн анх 2016 оноос гэрэл зураг дарж эхэлсэн. Тухайн үед хүүхдүүд зуны амралтаараа ажил хийж мөнгө цуглуулдаг байсан даа, би тэр жишгээр нэг зун барилга дээр ажиллаад цуглуулсан мөнгөөрөө Canon брэндийн жижиг камер авч байсан юм. 

Энгийнээр бол өөрт ойр зүйлээсээ л эхэлсэн гэж хэлж болно. Би уг нь байгалийн гэрэл зурагт сонирхолтой, цаашдаа ч энэ чиглэлийн гэрэл зургийг түлхүү дарах хүсэлтэй байдаг. Байгалийн гэрэл зураг нь ямар нэгэн хиймэл гэрэлтүүлэг ашигладаггүй бөгөөд энэ шинжээрээ гудамжны гэрэл зурагтай төстэй. Цаашлаад маш нарийн мэдрэмж шаарддаг энэ төрлийн гэрэл зургийг дарахын тулд байгалийн гэрлийг удирдаж сурах хүсэлтэй байдаг юм. Үүний тулд барилга, хүмүүсийн зургийг дарж эхэлж байсан. Анх сурч эхэлж буй хүмүүс ч мөн адил гэрээсээ гараад гадаа байгаа үзэгдлүүдийг ажиглаж камерт буулгаж эхэлдэг шүү дээ. 

Би мэргэжлийн модель хүмүүстэй ажиллахаас илүүтэй энгийн хүмүүстэй ажилладаг. Тэр дунд огт зургаа авхуулж үзээгүй ч хүмүүс бий. Хэрэв зургийг нь дарж буй хүн маань бага зэргийн сандралтай, биеэ бариад тухгүй байгаад байвал би алхаад үзэхийг зөвлөдөг. Энэ цэгээс тэр цэг хүртэл зүгээр л юу ч бодолгүй алхахыг зөвлөөд, тухайн мөчүүдэд амжиж зургийг нь дардаг. 

Зурган дээр гоё гардаг төрлийн буюу “photogenic” хүмүүс гэж байдаг. “Photogenic” байх нь тэдгээр хүмүүсийн нүүрний бүтцээс хамаардаг. Бидний мэдэх моделиуд ч мөн тэр нүүрний тэгш бүтэцтэй давуу талаа ашиглаад аль ч өнцгөөс яаж ч дарсан гоё гараад байдаг. Зураг бүр дээр гоё гардаг туршлага нь тэдгээр хүмүүсийг бас илүү өөртөө итгэлтэй, тухтай байхад нь нөлөөлдөг. Гэхдээ өөртөө таалагдсан зурагтай болохын тулд өөрийгөө “photogenic” эсэхэд санаа зоволгүй өөртөө итгэлтэй, тухтай байгаарай.

Хамгийн их ашигладаг зүйл бол миний утас. Камераар зураг, бичлэг хийсэн ч ихэвчлэн утсан дээрээ янзалдаг. Үүнээс гадна бичлэг хийхдээ ашигладаг утас тогтоогч байна. Цээжин дээрээ утсаа тогтоогоод бичлэгээ хийчихдэг болохоор их амар. 

Мэдээж өөрийн төсөв болон хэрэглээнд тааруулж камераа сонгох нь зөв. Дийлэнх зурагчид Sony A6000 гэсэн камераас эхэлсэн байдаг. Миний хувьд Sony RX10, Mark4 гэсэн камераас эхэлж байсан. Одоо Canon брэндийн R5 гэсэн камерыг ашигладаг. 

Би багаасаа 1 хувийн авьяас, 99 хувийн хөдөлмөр гэдэг үгэнд дуртай байсан. Оролцсон хүнийг аз дайрдаг шүү дээ. Би ч мөн өөрийгөө олон оролдлогын үр дүнд сурч сайжирсан гэж боддог. Хийж буй зүйлээ мэддэг байхад мэдрэмж цаанаасаа ундардаг болов уу даа.